Uwoya aeleza sababu za muvi za bongo kupotea sokoni

Uwoya ambaye ni mmoja wa waigizaji maarufu Bongo hivi karibuni alifunguka kueleza sababu za soko la muvi za kibongo kwenda chini.

Akizungumza na Global Publisherz, muigizaji huyo alisema kuwa kuna changamoto kadhaa ambazo zimechangia huku akiwalaumu wasambazaji wa muvi za kibongo wanazoziuza muvi hizi kwa bei ya chini.

Tazama mahojiano yake na Global Publisherz hapa;

Swali: Labda mimi siyo mfuatiliaji sana, lakini naona kama filamu zimesimama hivi au?

Uwoya: Zimesimama unamaanisha nini? Yaani hazizalishwi tena au?

Swali: Ninamaanisha haziko kama ilivyokuwa kipindi cha nyuma, filamu zilikuwa nyingi sokoni na watu wakizigombea, sasa hivi sizioni.

Uwoya: Ni kweli, sasa hivi wasanii wamepunguza kutengeneza kazi mpya, sababu kubwa ni soko, limekuwa gumu sana.

Swali: Limekuwa gumu kivipi?

Uwoya: Hapa pana changamoto nyingi, kwanza kwa wasambazaji wenyewe na pia kwa wanunuzi. Kwa upande wa usambazaji, wananunua kazi kwa bei ambayo inatuumiza na mara nyingi tunakuwa hatuna jinsi, ni bora tufanye kazi tuonekane kuliko kukaa tu nyumbani.

Swali: Huoni kuwa ubora duni wa kazi zenu ulichangia kwa wasambazaji kununua kwa bei ndogo?

Uwoya: Wakati mwingine uduni wa kazi unatokana na haohao wasambazaji ambao wana bei zao.