Lulu Diva Akana Tetesi Za Kunyang’anywa Mali Zote na Mpenzi Wake

Mwanamuziki wa Bongo fleva mwanadada Lulu Diva ameibuka na kukana tetesi za kunyang’anywa mali zote na mwanaume ambaye alikuwa na uhusiano naye wa kimapenzi.

Siku za hivi karibuni Lulu Diva amekuwa akitawala vichwa vya habari kwa kasi ya ajabu huku akitawaliwa na skendo kadhaa huku moja wapo ya skendo ambayo imekuwa ikimuandama ni suala zima la mahusiano yake ya kimapenzi.

Kwa kipindi kirefu sasa kumekuwa na tetesi kadhaa kuwa Lulu Diva ana uhusiano wa kimapenzi na msanii wa Bongo fleva kutoka katika kundi maarufu la WCB, Rich Mavoko ingawa yeye amekataa mara kwa mara mahusiano hayo lakini taarifa za mahusiano yao zimekuwa zilisambaa kila siku.

Kuna habari zilidai kuwa Lulu Diva ameachana na mpenzi wake wa siku nyingi anayeitwa Richard ambaye mapema mwaka jana aliweka wazi kuwa ametolewa mahari na yupo tayari kuolewa lakini siku chache zilizopita alikiambia kituo kimoja cha habari kuwa yeye na mpenzi wake wameachana na amesharudisha mahari.

Ingawa hakutaja sababu iliyopelekea wawili hao kuachana taarifa zilienea kuwa wamekata mahusiano yao baada ya Richard kugundua kuwa Lulu Diva ana mahusiano na msanii Rich Mavoko huku tayari akiwa kwenye mahusiano na yeye tayari.

Sasa siku ya jana taarifa zilidai kuwa Lulu Diva amenyang’anywa kila kitu alichonunuliwa na Richard ikiwemo nyumba aliyodai amenunua kwa milioni mia moja na gari la thamani taarifa ambazo jana hiyo hiyo alizipangua na kusema ingawa yeye na Richard wameachana lakini hajamnyang’anya kitu.

Kwenye mahojiano na East Africa Tv, Lulu Diva amezidi kufunguka haya kuhusu tetesi hizo:

Ni vitu ambavyo vimetokea lakini siwezi kuviongelea sana ila nakwambia jamaa siko kwenye mahusiano naye tena lakini nina imani tutakaa sawa kuhusu habari za kunyang’anywa vitu sio kweli sijanyang’nywa na hawezi kufanya hivyo ilikuwa ni ugomvi tu”.