Tumeteswa Sana na Media Nyingine, Asante WASAFI Tv Kwa Kuleta Usawa-Nikki Mbishi
Msanii wa Bongo fleva anayefanya miondoko ya kurap kuchana Nikki Mbishi ameibuka na kuimwagia sifa lukuki Wasafi Tv baada ya kupiga nyimbo yake.
Nikki Mbishi amefunguka na kudai kuwa amefurahishwa na mwanzo mzuri wa Wasafi Tv kwani imeonekana kupiga nyimbo za wasanii mbali mbali bila ubaguzi wala upendeleo wowote.
Nikki Mbishi amefunguka hayo kupitia ukurasa wake wa Instagram na kuandika waraka huu kuisifia Wasafi Tv:
Asante Wasafi TV nyie mmecheza wimbo wangu #NIMEKUMISS bila hata mimi kuwaletea, najua ndio mnaanza ila msisahau kuendelea hivi hivi. Hakuna kitu kinachojenga na kuimarisha misingi ya sanaa kama ushindani wenye usawa “Fair Competition” hii inamaanisha anayestahili na apate na asiyestahili akose japo fitna zipo tu.
Tumeshuhudia umwinyi na ubeberu kwa kipindi kirefu sana,wapo ambao walitaka uMungu mtu lakini walijishtukia wakabwaga na wengine walibwagwa na hiyo ni kwa sababu ya kuleta umatabaka wa kanda fulani na kanda fulani na kujuanajuana sana kiasi kwamba akina sisi tusiofungamana nao tukaishia kutengwa na kuonekana “VINEGA” Kila la kheri kwenye hii ligi ya mbuzi kuna siku daraja litapanda tutacheza ya ng’ombe na mpaka tembo nini simba. Ipo siku watajihoji na kujijibu wenyewe“.
Wasafi Tv imeonekana kupiga nyimbo ambazo ni za wasanii ambao ni wazi kabisa wana bifu na Diamond kama vile Ali Kiba, Ommy Dimpoz, Lady JD, Nay wa Mitego na wengineo.
